foto, film en geschiedenis van Nuth vroeger

maandag 15 november 2010

12. VERSJIL MOOS TER ZIN: VOCAAL – INSTRUMENTAAL

ongertitel: 'En wiej Nuth zich vreigelde'

dae groep achter et gezellehoes
Et fotobeukske van Nuth, of teminste e paar fotoos devan, mooste hiej aafgedrök kinne zin: dae groep op de kirktrappe en dae achter et gezellehoes mit de zangkvereiniging 'De Eendracht'. Cor sjreef onger diej van de trappe:  ‘…voerden zij in 1936 de operette "Sint Donatuskermis" op. Auteur van dit werk was Harry Crijns en componist Jan Driessen jr. Koorleider was J.L.Crijns....'

Et deit tich get, dien hawf femiele, nungk, naeve en nichte, dien zuster en dien breurs, dien vruwke zieeleger en dichzelf doa, noa miee es un hawf ieuw, weer te zien sjtoan. En al diej angere diejste zoee good gekind höbs en noe al alleneij biej Slivvenhier zint of zich vaerdeg maake vuur de reis. Och, doa zieen ich oach nog de jong woer vr et s juus uuver howwe: Lei van nonk Lewie, dae sjneuvelde.

Woerom diej ow fotoos, diej uch waarsjienlek nieks zegke, hiej noa vuur gehoald?
Ich kos zegke, dad ich et neet kin loate, meh toch oach om get angesj.  Ich how hiejboave es titel kinne zette: 'En wiej Nuth zich vreigelde'. En neet zoee bietje! Nieks nuujts, zul d'r zegke, gevreigeld haet me zich ummer in òs sjoeen zuide.
Et leep hoeeg op in diej joare darteg. Nuth leek verdeild in twiee kampe: diej om de harmenie en diej om de zangk. De meiste looge waal neet devan wakker meh toch.....
Eindrachteg hawwe de harmenie en 'Eendracht' saame de operet 'De kapitein van Köpenick' van Frans Olterdisse oet Mestreech, opgeveurd. Dat woar in de twinteger joare gewaes. Meh, dat woar biej sommege zengesj (diej oach de kietsj van et kirkoer oetmagkde) neet good gevalle. Cor Bertrand sjreef et onger de foto
van de 'Eendracht' hieel modès: 'Mede door een later ontstane tweedracht binnen deze vereniging ging "De Eendracht" ten gronde'.
Et woare gein sjloande ruuzings, dat neet. Hiej en doa woare waal get verwiete uuver en weer, meh dat dooge allein fanatieke aanhangesj van de twiee pertiee. De luuj woe et om drieede, zagte zich vrundjelek gojjendaag, dooge of dr nieks woar, nieks sjaef zoot,
Kort en good, de ganse zaak koom neer op wat me biej de maeldesj in de natuur oach ieeder joar zuut: doe bliefs van mien terrein aaf, angesj pik ich dich totste weg geis.
video
Jan Crijns met familie in 1946
(bij gelegenheid van 100 jarig jubileum Harmonie St. Bavo)

Wat moos enne dirrekteur van de harmenie zich oach nog bezig howte mit et vocaale? En de Eindrach kepot maake? Dat moos ophuure. Wat wolle diej Criense, vuural dae Jan, dae oach al et kirkoer in Bronssem dirregeerde?
Wantroewe. En et woar zoee sjoeen verdeild gewaes, doa et vocaale, doa et instrementaale.....

meister Pinckesj
Wiej heilig me eijge femiele es kindj zuut en pertie trok vuur eige femiele, herinner ich mich nog van wiej ich e joar of twelf woar. Ich zoot doew in de klas van meister Pinckesj, God gaef 'm dn hieemel. Noa twelf oere trokke vr altied midde paar jonge noa de veerde klas van de dirrekteur van et jongeskuurke, dat saame mit et kirkkoeer sondes de letiense Mès zong. De meister zörgde zoee vuur de Nachwuchs. Vier groeete zoote da boave op de bangke en de klèndere vuuraan drin.
menier Pesjtoer Ritze


0p zeekeren daag woar et angesj es angesj: naeve de meister sjtong wiej vr binne koome, menier Pesjtoer Ritze. Vr woerte dr sjtil va. 0f vr ins good wolle loestere noa wat de meister òs ging vuurlaeze.
Langzaam, benoa plechteg, trok dae e pepier oet enne koaker en hae loos:


Reglement voor het jongenskoor.
Ieesjte artikel:
In kirk wuurt neet gemoeld, op et oksaal gaar neet.
Twieede artikel:
In kirk wuurt neet gerend, op et oksaal löp me langsaam
En zoee wieer, allemoal dinger diej vr good wiste, nieks nuujts. Tot et
letste punt.
'En noe kump et', zag ich taenge Herman de Man, naeve mich. En joa, doa koom de aap oet de moew et woar verboae mit enne angere dirrekteur dan de meister te zinge. . . . . zonger verlof.
Miene vinger gong es un vaer omhoeeg.
'Ja, Leo?'
'Mag ik dan niet met mijn eigen oom zingen?'
'De huusj wat de meister haet vuurgelaeze'
'Dan ga ik!'
En rooetsj, de bangk aaf en noa boete. En wad 'ch neet gedach en bedoeld haw:
dr koome dr nog ingkele achter mich aan.....
Ich haw gereageerd of mich un biej haw gesjtoake, zonger mich te bedingke (mit miee es sieveteg uuverkump mich dat soms nog:  mea maxima culpa...).
En ich noa heim, ongerwaeg mich zelf uuvertuugend dat ich good gedoan haw: et woar neet ieerlek, miene nonk zoee get aan te doeen, want dàt zoot drachter, zoee vas es un hoes. En zelfs menier pesjtoer! Dat dae zich vuur zoee'n kerke leet sjpanne.....
Mam woar in de kuueke en hoert aa wad 'ch zag en.... wadzjde mich om mien oere. 'Gow truuk en zegke dattet dich sjpiet, 'lummel. Truuk èn gow! Sjaamste dich neet!
Koetjong en al zoee vrech.......'
Dat haw ich heim noeets gelieerd, menier pesjtoer Ritze en de meister zoee te beleedege. Dat moos good gemak waere.
Mam haw neet debiej bedach, dad 'ch groeete oere haw en es owdste al gans get verhoale haw opgevange, diej vertèld woerte doer nungk en tantes, went ze soaves nog inkoape koome doeen en denoa gezelleg un uurke of miee bleeve, kalle uuver van alles en nog get. De meneer van kalle en lache en et gesjtichel soms hawwe deepe indrökke in mich achtergelaote.
Ich kòs mam neet begriepe: ich woar toch vuur de ieer van de femiele opgekomme!

Wat woar gebuuerd?
Sint Rafael, de vereiniging van de sjpoarluuj, woe pap, mein ich besjtuurslid van woar, haw e jubeleumsfiees. Ich dingk dat pap nonk Sjeng gevroag haw om dae oavend get te zinge mit get jonge. En op zien buurt haw nonk mich gevroag get jonges te vroage. En wae vroog ich dus? Natuurlek diej mit mich in et jongeskoer zonge. Sondes noa et aete woar al twiee kiere geoefend.
Ich weit et nog, et leed hoosj: Jeruzalem.
Wieer zint vr neet gekomme..... Ich dingk dat mam e wuurdje mit nonk gekald haw.
Kingerwerk.

Geen opmerkingen:

Een reactie plaatsen